भारताने पाकिस्तानवर विजयाची संधी गमावली, अखेरच्या क्षणी गोल पत्करला आणि सामना बरोबरीत सुटला

 

Asia Cup Hockey 2022 Update: भारत आणि पाकिस्तान यांच्यातील आशिया चषक स्पर्धेचा सामना चांगलाच चुरशीचा झाला. भारताने या सामन्यात सुरुवातीला आघाडी घेतली होती. पण तिसऱ्या सत्रात भारताच्या कर्णधाराला ग्रीन कार्ड मिळाले आणि पाकिस्तानचा संघ गोल करण्यासाठी सरसावला होता. पण भारताने यावेळी दमदार बचाव कसा असतो, हे तिसऱ्या सत्रात दाखवून दिले. त्यामुळे चौथ्या सत्रातची रंगत जास्त वाढली.

जकार्ता : भारत आणि पाकिस्तान यांच्यातील आशिया चषकातील आजचा सामना चांगलाच रंगला. भारताने सुरुवातीपासूनच दमजार खेळ केला आणि सामन्यावर वर्चस्व राखल्याचे पाहायला मिळाले होते. अखेरची पाच मिनिटं शिल्लक असतानाही भारताकडे दमदार आघाडी होती. भारताने ही आघाडी अखेरचे दोन मिनिटं असेपर्यंत कायम ठेवली होती. पण सामना संपायला दोन मिनिटं शिल्लक असताना पाकिस्तानच्या अब्दूल राणाने गोल करत सामन्यात १-१ अशी बरोबरी साधली आणि भारताने विजयाची संधी गमावली.

सामन्याच्या ८ व्या मिनिटालाच भारताकडे गोल करण्याची सुवर्णसंधी चालून आली होती. भारताला आठव्या मिनिटाला पेनेल्टी कॉर्नर मिळाला. यापूर्वी भारताने तीन कॉर्नरवर गोल करण्याची संधी गमावली होती. पण यावेळी मात्र भारताने संधी सोडली नाही. या सामन्यात पदार्पण करण्याची करण्याची सेल्वम कार्थीला देण्यात आली होती आणि त्याने या संधीचे सोने केल्याचे पाहायला मिळाले. कारण सेल्वमने या पेनेल्टी कॉर्नरचे रुपांतर गोलमध्ये केले आणि संघाला १-० अशी आघाडी मिळवून दिली. भारतााला पहिल्याच सत्रात आघाडी मिळाली आणि त्यानंतर पाकिस्तानने जोरदार आक्रमण करत बरोबरी करण्याचा प्रयत्न केला. पण पहिल्या सत्रात भारताने पाकिस्तानचे आक्रमण थोपवून लावले. दुसऱ्या सत्रातही पाकिस्ताने भारतावर कुरघोडी करण्याचा प्रयत्न केला. पण भारताच्या संघाने यावेळी दमदार बचाव करत पाकिस्तानचे आघाडी घेण्याचे प्रयत्न हाणून पाडले. तिसऱ्या सत्रात भारताला एक मोठा धक्का बसला. कारण याव्ळी भारताच्या कर्णधाराला ग्रीनन कार्ड दाखवण्यात आले आणि तो संघाबाहेर गेला. त्यावेळी पाकिस्तानकडे गोल करून सामन्यात बरोबरी करण्याची चांगली संधी होती. पण यावेळी भारताने बचावावर अधिक भर दिला आणि पाकिस्तानचे तिसऱ्या सत्रात गोल करण्याच स्वप्न बेचिराख केले. चौथ्या सत्राच्या सुरुवातीपासून भारताने बचावावर अधिक भर दिला. अखेरच्या सत्रात पाकिस्तानचे खेळाडू गोल करण्यासाठी जीवाचा आटापिटा करत होता. पण भारताने यावेळी दमदार बचाव कसा असावा, याचा उत्तम वस्तुपाठ दाखवून दिला होता. भारत आणि पाकिस्तान यांनी प्रत्येकी ३ वेळा या स्पर्धेचे विजेतेपद मिळवले आहे. भारताने २०१७ साली अखेरचे विजेतेपद ढाका येथे मलेशियाचा पराभव करून मिळवेल होते. त्यामुळे या आशिया चषकात भारतीय संघ कशी कामगिरी करतो, याकडे सर्वांचे लक्ष लागलेले असेल.