गडहिंग्लज : येथील शिवराज महाविद्यालयाने २०२४-२५ या शैक्षणिक वर्षात शिवाजी विद्यापीठाच्या गुणवत्ता शिष्यवृत्ती मध्ये विज्ञान व तंत्रज्ञान विद्याशाखेत तसेच वाणिज्य व व्यवस्थापन विद्याशाखेत निमशहरी गटात प्रथम क्रमांक पटकाविले. शिवाजी विद्यापीठ परिक्षेत्रातील २९० महाविद्यालयामध्ये सलग दोन पारितोषिके पटकाविणारे एकमेव महाविद्यालय म्हणून शिवराज महाविद्यालयास गौरविले आहे. विज्ञान व तंत्रज्ञान विद्याशाखेत पटकाविणारा सलग पाचव्यांदा आणि वाणिज्य व व्यवस्थापन विद्याशाखेत सलग दुसऱ्यांदा हे पारितोषिक पटकाविण्याचा मान महाविद्यालयाला मिळाला आहे. शिवाजी विद्यापीठ कोल्हापूर येथे आयोजित कार्यक्रमात शिवाजी विद्यापीठाचे कुलगुरू डॉ.डी.टी.शिर्के यांच्या हस्ते प्राचार्य डॉ.एस.एम.कदम यांना विज्ञान व तंत्रज्ञान विद्याशाखेचे प्रशस्तीपत्र देऊन गौरविण्यात आले तर शिवाजी विद्यापीठाचे प्र-कुलगुरू डॉ.पी.एस.पाटील यांच्या हस्ते प्रा.विश्वजित कुराडे यांना वाणिज्य व व्यवस्थापन विद्याशाखेचे प्रशस्तीपत्र देऊन गौरविण्यात आले.
ग्रामीण विद्यार्थ्यांना शिक्षणाबरोबर करिअरच्या संधी देण्यात आमचे महाविद्यालय नेहमीच अग्रेसर आहे. महाविद्यालयाने सलग पाच वर्षे विज्ञान व तंत्रज्ञान आणि वाणिज्य व व्यवस्थापन मध्ये सलग दुसऱ्यांदा हा बहुमान पटकाविला आहे. ग्रामीण भागातील विद्यार्थ्यांना घडविणारे महाविद्यालय म्हणून शिवराज महाविद्यालयाने आपलेपण जपले आहे. संस्था अध्यक्ष प्रा.किसनराव कुराडे यांच्या मार्गदर्शनाने आमच्या महाविद्यालयात विविध उपक्रमशील व कौशल्यपूर्ण शिक्षणाच्या योजना राबविण्यासाठी आम्ही धडपडत आहोत. या प्रयत्नाला यश मिळत आहे. महाविद्यालयातील पारंपारिक व व्यावसायिक शिक्षणाचा लाभ या उपविभागातील आणि सीमाभागातील विद्यार्थ्यांनी घ्यावा या उद्देशाने शिवराज महाविद्यालयाचा हा ‘ज्ञानरथ’ पुढे वाटचालीत करीत आहे. ‘शिवराज’च्या माध्यमातून ज्ञानदानाचे कार्य करीत ग्रामीण विद्यार्थ्यांशी ऋणानुबंध जपले जात आहे. शिवाय महाविद्यालयात अधिका-अधिक विद्यार्थी शिकावेत व प्लेसमेंट विभागाच्या माध्यमातून विद्यार्थ्यांचा आर्थिक स्तर उंचाविण्यासाठी अनेक नामांकित बहुराष्ट्रीय कंपन्यांशी महाविद्यालयाने सामंजस्य करार केलेले आहेत. यासाठी आपण प्रयत्नशील असल्याचे शिवराज विद्या संकुलाचे सचिव डॉ.अनिल कुराडे यांनी सांगितले. प्राचार्य डॉ.एस.एम.कदम यांनी शिवराज महाविद्यालयाच्या विज्ञान व तंत्रज्ञान व वाणिज्य व व्यवस्थापन विभागाला हा बहुमान मिळाला आहे. शिवाजी विद्यापीठ परिक्षेत्रातील एक सक्षम महाविद्यालय म्हणून शिवराज महाविद्यालयाने आपला ठसा उमठविला आहे. आमच्या भागातील विद्यार्थ्यांना शिवराज महाविद्यालयाने घडविण्यासाठी दिलेल्या बहुमोल योगदानाचे खऱ्याअर्थी फलित असल्याचे त्यांनी स्पष्ट केले. हा बहुमान महाविद्यालयाच्या विविध शाखांना मिळावा यासाठी देखील आम्ही प्रयत्नशील राहून गुणवत्ता शिष्यवृत्तीत अव्वल ठरण्यासाठी ग्रामीण विद्यार्थ्यांच्या ज्ञानाचा कणा अधिक मजबूत करण्याचा प्रयत्न शिवराज महाविद्यालयाच्या माध्यमातून करण्यात येणार असल्याचे प्राचार्य डॉ.कदम यांनी स्पष्ट केले.