गडहिंग्लज : अन्न व निवारा या बरोबर वाचन ही सुध्दा माणसाची मुलभूत गरज आहे. महाविद्यालयीन जीवनात विद्यार्थ्यांनी विपुल वाचन केले पाहिजे कारण वाचनाने माणूस समृध्द होऊन त्याच्या व्यक्तीमत्वास आकार येतो असे प्रतिपादन शिवराज विद्या संकुलाचे सचिव डॉ. अनिलराव कुराडे यांनी केले. येथील शिवराज महाविद्यालयात ग्रंथालय व रसायनशास्त्र विभाग यांच्या संयुक्त विद्यमाने माजी राष्ट्रपती भारतरत्न डॉ. ए. पी. जे. अब्दूल कलाम यांची जयंती व वाचन प्रेरणा दिनानिमित्त आयोजित कार्यक्रमात ते बोलत होते. अध्यक्षस्थानी रसायनशास्त्र विभाग प्रमुख डॉ. ए.एम. हरे होते.
डॉ. कुराडे पुढे म्हणाले. वाचनाने माणूस पडत जातो आणि त्याला सामाजिक भान येते. दुर्दैवाने तंत्रज्ञानाच्या मागे लागून माणूस अधिकाधिक आत्मकेंद्री होऊन समाजभान विसरत चालला आहे. हे हरविलेले समाजभान पुन्हा मिळविण्यासाठी वाचन हाच उत्तम पर्याय असल्याचे त्यांनी स्पष्ट केले.
यावेळी अॅकॅडमी डायरेक्टर डॉ. आर. एस. निळपणकर यांनीही विद्यार्थ्यांना मार्गदर्शन केले. डॉ. रुपेश पाटील यांनी डॉ. ए.पी.जे. अब्दूल कलाम यांच्या जीवनकार्यावर विद्यार्थ्यांना मार्गदर्शन केले. प्रारंभी डॉ. ए.पी.जे. अब्दूलकलाम यांच्या प्रतिमेचे पूजन करण्यात आले. ग्रंथपाल श्री संदीप कुराडे यांनी स्वागत करून प्रास्ताविकामध्ये डी.ए.पी.जे. अब्दूल कलाम यांच्या स्वप्नातील भारत कसा अपेक्षित आहे. डॉ. कलामांनी देशासाठी दिलेले योगदान सांगून आणि त्यांचा जन्मदिन वाचन प्रेरणा दिन म्हणून साजरी करण्याचे प्रयोजन काय आहे हे सांगितले.
या कार्यक्रमाबरोबरच महाविद्यालयात 'वाचन प्रेरणा दिन' व 'भारतरत्न ए.पी.जे कलाम यांची जयंती" विविध उपक्रमांनी साजरी करण्यात आली. वाचन प्रेरणा दिनाचे औचित्य साधून वरिष्ठ व कनिष्ठ महाविद्यालयातील मराठी विभागाच्यावतीने ज्येष्ठ साहित्यिक प्रा. किसनराव कुराडे लिखित श्री भृणहत्येवर आधारित 'चिगीचा माइंडसेट" या ग्रंथाचे अभिवाचन केले. हे अभिवचन निवडक २० विद्यार्थ्यांनी केले. याच बरोबर महाविद्यालयाच्या ग्रंथालयात 'वाचावीत अशा पुस्तकांचे ग्रंथ-प्रदर्शन भरविण्यात आले. या प्रदर्शनास पाचशेच्यावर विद्यार्थ्यांनी भेट दिली.
या कार्यक्रमास पदव्युत्तर विभाग प्रमुख डॉ. सुधीर मुंज, प्रा. विक्रम शिंदे, डॉ. प्रवीण डोंगरे, प्रा. नीळकंठ भोसले, प्रा. साहिल समडोळे, डॉ. संदीप पाटील, डॉ. श्रद्धा पाटील, प्रा. गीता देसाई यांच्यासह प्राध्यापक, प्रशासकीय सेवक, विद्यार्थी-विद्यार्थिनी उपस्थित होते. कार्यक्रमाचे सूत्रसंचालन डॉ. अल्ताफ हुसेन नाईकवाडी यांनी केले तर प्रा. गिरीराज पाटील यांनी मानले.