गडहिंग्लज : विद्यार्थ्यांना इंग्रजी विषयात करिअर करण्यासाठी भरपूर संधी आहेत. इंग्रजी भाषेचे महत्व अनन्यसाधारण आहे हे विद्यार्थ्यांनी लक्षात घेऊन त्या भाषेवर प्रभुत्व मिळविण्यासा विद्यार्थ्यांनी प्रयत्न केला पाहिजे. या जगात आपण टिकायचे असेल तर इंग्रजी भाषेकडे दुर्लक्ष करून चालणार नाही, असे प्रतिपादन देवचंद महाविद्यालयाचे प्रा.बी.जी.पाटील यांनी केले. येथील शिवराज महाविद्यालयात इंग्रजी विभागाच्या वतीने आयोजित 'इंग्रजी विषयातील करिअरच्या संधी' या विषयावर प्रमुख पाहुणे म्हणून ते बोलत होते. या कार्यक्रमाच्या अध्यक्षस्थानी प्राचार्य डॉ. एस.एम. कदम होते. प्रारंभी स्वागत व प्रास्ताविक इंग्रजी विभाग प्रमुख प्रा. डी. यु. जाधव यांनी केले. पाहुण्यांचा परिचय प्रा. पौर्णिमा कुराडे यांनी करून दिला.
या समारंभात प्रा. बी. जी. पाटील यांनी विद्यार्थ्यांना मार्गदर्शन करताना पुढे म्हणाले- इंग्रजी विषय हा अवघड मानून न घेता त्या विषयात गोडी निर्माण केली तर त्यासारखी सोपी भाषा नाही. आपण इंग्रजीचा वापर केल्याशिवाय कोणतीही भाषा शुद्ध बोलू शकत नाही. इंग्रजीचा विद्यार्थी कोणत्याच क्षेत्रात कमी पडत नाही हे स्पष्ट करून प्रा. पाटील यांनी इंग्रजी भाषेचे महत्व व रोजगार नोकरीच्या संधी कोणकोणत्या क्षेत्रात आहेत हे सविस्तरपणे सांगितले. शिवराज विद्या संकुलाचे सचिव डॉ. अनिलराव कुराडे यांनी आपल्या मार्गदर्शनामध्ये इंग्रजी भाषा खूप महत्वाची भाषा आहे. जगभर भ्रमंती करताना या भाषेतून संवाद साधने मोलाचे ठरते. त्यामुळे आपल्या मातृभाषेसोबत इंग्रजी भाषा शिकणे गरजेची असल्याचे त्यांनी स्पष्ट केले.
यावेळी प्रा. प्राजक्ता बालेशगोल, डॉ. जी. जी. गायकवाड, डॉ.आर.पी. हेंडगे, डॉ. एस.बी.माने, डॉ. श्रद्धा पाटील, प्रा. शरद पाटील, यांचासह अन्य प्राध्यापक, विद्यार्थी-विद्यार्थीनी उपस्थित होते. कार्यक्रमाचे सूत्रसंचालन, प्रा. डी.व्ही. गाडेकर यांनी केले तर आभार प्रा. व्ही. एस. दानवडे यांनी मानले.