गडहिंग्लज, ता. १२ : पीएम किसान योजनेत शासकीय कर्मचाऱ्यांनी चुकीची माहिती भरली आहे. त्यामुळे हलकर्णी गावचे नाव बदलून आंबेवाडी झाले आहे. सुमारे १०० लाभार्थी अपात्र ठरले आहेत. त्यांना पात्र-अपात्रतेच्या फेऱ्यातून बाहेर काढावे आणि योजनेचा लाभ द्यावा, अशी मागणी महाराष्ट्र नवनिर्माण सेनेतर्फे करण्यात आली आहे. तहसीलदारांना याबाबतचे निवेदन दिले आहे.
पीएम किसान योजनेत चुकीच्या 'केवायसी'मुळे १०० लाभार्थी अपात्र ठरले आहेत. त्यांना आवश्यक कागदपत्रे जमा करण्यास सांगितले आहे. त्यासाठी लाभार्थ्यांच्या चकरा सुरू आहेत. त्यांना मार्गदर्शनाची जबाबदारी कृषी
सहायकांवर दिलेली आहे; पण एका कृषी सहायकावर तेरा गावांचा भार आहे. याचा विचार करून कृषी सहायकांची नेमणूक व्हावी, तसेच लाभार्थ्यांना पात्र- अपात्रतेच्या फेऱ्यातून बाहेर काढावे. अन्यथा अन्यायग्रस्त शेतकऱ्यांना घेऊन मनसे स्टाईलने आंदोलन करण्याचा इशारा निवेदनातून देण्यात आला आहे.
मनसेचे जिल्हाध्यक्ष नागेश चौगुले, तालुकाध्यक्ष शिवानंद मठपती, शहराध्यक्ष केंप्पाना कोरी यांच्यासह शंकर बिरंजे, दुंडाप्पा रामाजगोळ, सत्याप्पा पाटील, मारुती पाटील, भीमराव पाटील, राम जांबोजी, रावसाहेब सावंत, प्रकाश पाटील, दुंडाप्पा पाटील, रामगोंडा रामाजगोळ या शेतकऱ्यांच्या स्वाक्षऱ्या आहेत.
