सार्वजनिक बांधकाम विभागाच्या बैठकीत अधिकाऱ्यांना सुचना
कोल्हापूर प्रतिनिधी,
दळणवळणाच्या सुविधा चांगल्या प्रकारच्या उपलब्ध करून देण्यासाठी महाराष्ट्र शासनाने राबविलेल्या हायब्रीड ॲन्युटी HAM अंतर्गत निपाणी-देवगड, कुर-शेळेवाडी, परिते ते वाशी असे पॅकेज नं.47 व 48 असे दोन रस्ते मंजूर होवून 4 वर्षे झाली तरी अद्याप या रस्त्यांची कामे पुर्ण झालेलीनाहीत. यामुळे नागरीकांची गैरसोय होत असून हायब्रीड ॲन्युटी अंतर्गत मंजूर रस्त्यांची कामे तात्काळ पुर्ण करा अशा सुचना आमदार प्रकाश आबिटकर यांनी सार्वजनिक बांधकाम विभागाचे अधिक्षक अभियंता एस.पी.कुंभार यांना केल्या.
ते राधानगरी, भुदरगड व आजरा तालुक्यातील बांधकाम विभागाच्या प्रलंबित कामांबाबत सार्वजनिक बांधकाम मंडळ, कोल्हापूर येथे आयोजित बैठकीमध्ये बोलत होते.
यावेळी बोलताना आमदार आबिटकर म्हणाले की, हायब्रीड ॲन्युटी HAM अंतर्गत निपाणी-देवगड, कुर-शेळेवाडी, परिते ते वाशी असे पॅकेज नं.47 व 48 असे दोन रस्ते मंजूर आहेत. सदर रस्त्याचे काम करणाऱ्या कंपनीने कामास केलेल्या दिरंगाईमुळे रस्त्याचे काम अद्याप अपुर्ण अवस्थेत आहेत. सदर रस्ते अपुर्ण असल्यामुळे नागरीकांना त्रास होत असून अपघातांचे प्रमाण वाढले आहे. त्यामुळे सर्वसामान्य नागरीकांमध्ये असंतोषाचे वातावरण पसरलेले आहे. यासाठी संबंधीत कंपनीला रस्त्याची कामे वेळेत करण्यासाठी वेळेची मर्यादा देऊन काम पुर्ण करणे गरजेचे असून त्याबाबतच्या सुचना कंपनीस द्याव्यात. तसेच यावर्षी झालेल्या अतिवृष्टीमुळे रस्त्यांचे मोठ्या प्रमाणात नुकसान झालेले असून खड्डे देखील प्रचंड प्रमाणात पडलेले आहेत. यामुळे नागरीकांना त्रास सहन करावा लागत असून तात्काळ या रस्त्यावरील खड्डे भरावेत अन्यथा संबंधीत अधिकाऱ्यांवर कारवाई करावी. तसेच परिते ते राधानगरी व कूर ते गडहिंग्लज यारस्त्यांच्या कामाला निधी मंजूर असून तात्काळ या रस्त्यांची कामे सुरू करावीत. राधानगरी, भुदरगड व आजरा तालुक्यातील तहसील इमारत, प्रातंत कार्यालय, सोळांकूर उपजिल्हा रुग्णालय या इमारतींची कामे तात्काळ सुरू करावीत. तसेच आजरा व कसबा तारळे उपजिल्हा रुग्णालय कसबा तारळे चे इमारत बांधकाम अंदाजपत्रक शासनाकडे प्रशासकीय मान्यता मिळवण्यासाठी पाठवण्यात यावे अशा सुचना केल्या व राधानगरी व आजरा क्रिडा संकुलाचे देखील काम जलद गतीने सुरू करावे अशा सुचना केल्या.
यावेळी अधिक्षक अभियंता एस.पी.कुंभार, माजी उपसभापती अरुणराव जाधव, माजी सरपंच सागर धुंदरे, कार्यकारी अभियंता प्रविण जाधव, उपअभियंता राधानगरी एस.बी.इंगवले, उपअभियंता भुदरगड श्री.मिरजकर, अभियंता आजरा राजेंद्र सावंत, उपकार्यकारी अभियंता संजय माने, विजय बलुगडे यांच्यासह अधिकारी उपस्थित होते.
फोटो : सार्वजनिक बांधकाम विभागाच्या बैठकीमध्ये अधिकाऱ्यांना सुचना देताना आमदार प्रकाश आबिटकर, उपस्थित अधिक्षक अभियंता एस.पी.कुंभार, माजी उपसभापती अरुणराव जाधव, माजी सरपंच सागर धुंदरे, कार्यकारी अभियंता प्रविण जाधव आदी अधिकारी.