गडहिंग्लज येथील शिवराज महाविद्यालय व संभाजीराव माने ज्युनिअर कॉलेज यांच्या संयुक्त विद्यमाने आयोजित सत्कार समारंभात संस्थेच्या संचालिका व संभाजीराव माने ज्युनिअर कॉलेजच्या परीक्षा विभाग प्रमुख प्रा सौ. बिनादेवी कुराडे यांना अन्नपूर्णा मानिनी पुरस्काराने सन्मानित केल्याबद्दल त्यांचा सामाजिक कार्यकर्त्या सौ. उज्वलाताई दळवी यांच्या हस्ते सत्कार करण्यात आला. या कार्यक्रमाच्या अध्यक्षस्थानी प्राचार्य डॉ. एस. एम.कदम होते. या कार्यक्रमास शिवराज विद्या संकुलाचे सचिव डॉ. अनिलराव कुराडे, उपाध्यक्ष अॅड. दिग्विजय कुराडे यांची प्रमुख उपस्थिती लाभली.
यावेळी ‘चिंध्याच्या बाहुल्या’ या कादंबरीला पुरस्कार मिळाल्याबद्दल डॉ. श्रद्धा पाटील, ग्रीन कॅम्पस व क्लीन कॅम्पस मध्ये योगदान दिल्याबद्दल डॉ. विद्या देशमुख, प्रा. तंझिला काझी, गेट परीक्षेत उत्तीर्ण झाल्याबद्दल प्रा.प्रवीण सरनोबत, शिवराज फार्मसीचा विद्यार्थी श्री शिवराज बिराजदार तसेच आकाशवाणी शास्त्रीय संगीत गायनात स्वर चाचणीत निवड झालेले महाविद्यालयाचे विद्यार्थी अर्णव मच्छिन्द्र बुवा व निमेश गिरीश देवार्डे यांचाही सत्कार मान्यवरांच्या हस्ते करण्यात आला.
यावेळी सामाजिक कार्यकर्त्या सौ. उज्वलाताई दळवी यांनी आपल्या मार्गदर्शनामध्ये पुरस्काराने आपली जबाबदारी वाढते. असे पुरस्कार आपल्या समाजशील कार्याला बळ देत असतात. यातून आपल्या कार्याला अधिक गती प्राप्त होते. या गतीनेच आपल्या जीवनात यशस्वी होण्याची खरी संधी प्राप्त होते असे प्रतिपादन त्यांनी केले. सचिव डॉ. अनिलराव कुराडे यांनी समाजात कर्तृत्वाने स्त्रीया पुढे येत आहेत. आपल्या कार्यातून सिध्द होत आहेत हे निश्चितच अभिमानास्पद आहे. अशा कार्याचा सन्मान झालाच पाहिजे तरच त्यांना पुढील कार्याला खऱ्याअर्थी प्रेरणा मिळेल असे त्यांनी सांगितले. यावेळी सत्काराला उत्तर देताना प्रा.सौ.बिनादेवी कुराडे यांनी मी आजपर्यंत जे-जे आत्मीयतेने करीत राहिले त्याचा हा परिपाक आहे. माझ्या कार्यातून समाजासाठी जे-जे योगदान देता येईल ते मी देतच राहणार असल्याचे सांगून आपल्या कार्याला कुराडे कुटुंबियांकडून मिळालेला पाठिंबा तसेच सर्व शिवराज परिवाराकडून मिळालेले सहकार्य मोलाचे असल्याचे त्यांनी स्पष्ट केले. यावेळी प्राचार्य डॉ. एस. एम.कदम यांनी अध्यक्षीय भाषणातून शुभेच्छा व्यक्त केल्या. डॉ.श्रद्धा पाटील यांनीही आपल्या सत्काराबद्दल कृतज्ञता व्यक्त केली. यावेळी प्रा.आझाद पटेल, पर्यवेक्षक प्रा.तानाजी चौगुले, ज्युनिअर विना-अनुदानित प्रमुख प्रा.एस.पी. कुराडे, ग्रंथपाल श्री संदीप कुराडे, प्रा.विक्रम शिंदे यांच्यासह सर्व प्राध्यापक, प्रशासकीय कर्मचारी, विद्यार्थी-विद्यार्थिनी उपस्थित होते. पर्यवेक्षक प्रा.तानाजी चौगुले यांनी स्वागत व प्रास्ताविक केले तर प्रा.स्वप्नील आर्दाळकर, प्रा.प्रियांका जाधव यांनी सूत्रसंचालन केले तर आभार प्रा.तानाजी भांदुगरे यांनी मानले.