गडहिंग्लज : येथील शिवराज महाविद्यालयाची खेळाडू श्रुत्ती तानाजी चौगुले यांनी उत्तराखंड येथे पार पडलेल्या ‘३८ नॅशनल कयाकिंग’ स्पर्धेत के-४ पाचशे मीटरमध्ये सुवर्णपदक पटकाविले आहे. या दैदिप्यमान यशाबद्दल केंद्रसरकारकडून सहा लाख रुपयांचे पारितोषिक व मेडल प्राप्त झाले आहे. महाविद्यालयात श्रुतीचे शिवराज विद्या संकुलाचे अध्यक्ष प्रा.किसनराव कुराडे व संचालिका प्रा.सौ.बिनादेवी कुराडे यांच्या हस्ते शाल व ग्रंथ देऊन अभिनंदन करण्यात आले.
श्रुतीने यापूर्वी ३५ व्या राष्ट्रीय कॅनोइं तेहरी ग्रहवाल उत्तराखंडच्या स्पर्धेत के-४ एक हजार व पाचशे मीटर मध्ये सुवर्णपदक पटकावून कयाकिंग स्पर्धेत चमक दाखविली आहे तसेच मॉस्को (रशिया) येथील आंतरराष्ट्रीय कॅनोइंग स्पर्धेत सहभागी झाली होती. या खेळाडूला शिवराज विद्या संकुलाचे अध्यक्ष प्रा.किसनराव कुराडे, सचिव डॉ.अनिलराव कुराडे, उपाध्यक्ष अॅड.दिग्विजय कुराडे, प्राचार्य डॉ.एस.एम.कदम यांचे प्रोत्साहन तर क्रीडाशिक्षक डॉ.राहुल मगदूम, प्रा.जयवंत पाटील यांचे मोलाचे मार्गदर्शन लाभले.