गडहिंग्लज :येथील शिवराज कॉलेज ऑफ फार्मसीमध्ये नैसर्गिक रंग तयार करण्याची कार्यशाळा संपन्न झाली. या कार्यशाळेच्या अध्यक्षस्थानी प्राचार्य डॉ. राहुल जाधव होते तर प्रमुख पाहुणे म्हणून शिवराज विद्या संकुलाच्या संचालिका प्रा. सौ. बिनादेवी कुराडे होत्या. प्रारंभी प्रा. मनीषा जाधव यांनी स्वागत केले. प्रा. अनघा पाटील यांनी प्रास्ताविकामध्ये नैसर्गिक रंगांचे महत्व सांगितले.
यावेळी प्राचार्य डॉ. राहुल जाधव यांनी या कार्यशाळेचा हेतू विशद करताना पानां-फुलांपासून तयार केलेल्या' रंगांचा वापर औषधांमध्ये तसेच कॉस्मेस्टीक मध्ये केला जातो. या नैसर्गिक रंगाचा वापर रंगपंचमीसाठी करण्याची पूर्वापार परंपरा आहे. या नैसर्गिक रंगाचा आपल्या शरीरावर कोणताही वाईट परिणाम होत नाही. शरीर व कांती तजेलदार करण्यासाठी आजही आपण या नैसर्गिक औषधी वनस्पती वापरतो. ही खरी निसर्गाची देणगी आहे. यातून विद्यार्थ्यांना उद्योजक क्षेत्रात करिअर करण्याची संधी प्राप्त होते. शिवराज विद्या संकुलाच्या संचालिका प्रा.सौ. बिनादेवी कुराडे यांनी आपल्या मार्गदर्शनामध्ये फार्मसी कॉलेजच्या माध्यमातून आपल्या पारंपारिक रंगपंचमी सणाच्या निमित्याने हा आगळा-वेगळा उपक्रम राबवून विद्यार्थ्यांमध्ये नैसर्गिक रंगाबाबत जनजागृती करण्यात आली आहे. आज बाजारात केमिकलयुक्त रंगांचा मोठ्या प्रमाणात वापर होत आहे. त्यापासून दूर होऊन नैसर्गिक रंगाचा उत्सव साजरा करणे आवश्यक आहे असे त्यांनी स्पष्ट केले. यावेळी विद्यार्थ्यांनी औषधी वनस्पती, पाने- फुले यापासून बनविलेल्या नैसर्गिक रंग स्पर्धेचे परीक्षण प्रा. दर्शनी बेलेकर, प्रा. गीता केजानु यांनी केले. सांस्कृतिक विभागाच्या प्रमुख प्रा. सुमन अडीसरे, प्रा. अनघा पाटील यांनी कार्यक्रमाचे आयोजन केले. शेवटी कु. वैष्णवी पाडले यांनी आभार मानले.