गडहिंग्लज-लोकसभा निवडणुकीपूर्वी चंदगड, आजरा आणि गडहिंग्लज तालुक्यात संविधान बचाव रॅली काढून लोकसभा निवडणुकीत जनतेचे मत परिवर्तन घडविल्याने चंदगड विधानसभा मतदार संघात आम्ही आघाडीचे उमेदवार छत्रपत्री शाहू महाराज यांना आघाडी देऊ शकलो. येणाऱ्या निवडणुकीतही आम्ही एकसंघपणे सामोरे जाऊन महायुतीच्या उमेदवाराचा पराभव करणार आहोत. महाविकास आघाडीला जनतेतून मिळालेला पाठिंबा पाहून यावेळी अनेक उमेदवार आघाडी कडून लढण्यास इच्छुक आहेत. आम्ही सर्वजण जसे लोकसभेच्या निवडणुकीत एकसंघ होतो तसेच आजही विधानसभा निवडणुकीत एकसंघ राहणार आहोत. याबाबत महाविकास आघाडीच्या वरिष्ठ नेतृत्वाने जनतेत असलेला निष्ठावान कार्यकर्त्याला उमेदवारी दिली पाहिजे. यासंदर्भात आम्ही महाविकास आघाडीच्या सर्वच वरिष्ठ नेत्यांना भेटून आमचे म्हणणे आणि वस्तुस्थिती त्यांच्यासमोर ठेवली आहे. आम्हाला विश्वासात घेऊनच जनतेत असलेल्या प्रामाणिक आणि स्थानिक नेतृत्वाला उमेदवारी दिली पाहिजे. यासाठी चंदगड विधानसभा मतदार संघातील कार्यकर्ते आणि जनतेशी संवाद साधण्यासाठी रविवार दि २० ऑक्टोबर २०२४ रोजी सकाळी ठीक ११.०० वाजता अनिकेत मंगल कार्यालय येथे मेळावा आयोजित केला आहे. या मेळाव्यात कार्यकर्ते आणि जनतेशी संवाद करूनच पुढील निवडणुकी बाबतची भूमिका निश्चित करण्यात येईल. तरी या मेळाव्याला कार्यकर्ते व जनतेने मोठ्या संख्येने उपस्थित रहावे ही विनंती.