बसर्गे - श्री लक्ष्मी विविध कार्यकारी सहकारी (विकास) सेवा संस्थेचा आज (दि.२९) बसर्गे बु ॥ (ता. गडहिंग्लज) येथे अमृत महोत्सवी (७५ वर्षे) सोहळा पार पडला. या अमृत महोत्सव निमीत्ताने सभासदांना लाभांश वाटप व सत्कार करण्यात आला.हा कार्यक्रम प्रमुख पाहुणे आमदार राजेश पाटील आणि कार्यक्रमाचे अध्यक्ष सुरगीश्वर मठाचे मठाधिपती गुरुसिद्धेश्वर महास्वामीजी यांच्या उपस्थित पार पडला.
कार्यक्रमा दरम्यान बोलत असताना महास्वामीजी म्हणाले, "ही संस्था ७५ वर्षांमध्ये उभी राहिली नसती तर आज आम्ही या संस्थेचा अमृत महोत्सव यावर्षी बघितला नसता. या संस्थेच्या माध्यमातून शेतकऱ्यांना खूप मदत झालेली आहे. या संस्थेमध्ये विविध पक्षाचे लोक आहेत. पण ज्यावेळी या संस्थेचं एखाद काम असते त्यावेळी सगळे लोक पक्ष सोडून संस्थेसाठी काम करत राहतात. हे या संस्थेचे सर्वात मोठे यश आहे."
आमदार राजेश पाटील उपस्थितांना संबोधताना म्हणाले, "आदरणीय संतोष पाटील यांच्या माध्यमातून सहकार क्षेत्राला एक चांगला तरुण आणि होतकरू कार्यकर्ता मिळाला आहे. अशा सर्व कार्यकर्त्यांच्या पाठबळावर आज हे सहकार क्षेत्र चांगली प्रगती करत आहे. सहकाराच्या माध्यमातून महाराष्ट्रामध्ये स्व. यशवंतराव चव्हाण, वसंतदादा पाटील, शरदचंद्रजी पवार यासारख्या अनेक दिग्गज नेत्यांनी विकास कामे केली आहेत.सहकार वाढवण्याच आणि टिकवण्याचं काम केले आहे."
पुढे बोलताना ते म्हणाले, "वेगवेगळ्या पक्षाचे, विचारांचे, गटांचे लोक सेवा सोसायटीची निवडणूक गावाच्या विकासासाठी आणि शेतकऱ्यांच्या हितासाठी बिनविरोध करतात. ही अभिमानाची गोष्ट आहे.आपण राजकारण न करता समाजकारण केलं पाहिजे.आपण शेतकऱ्यांच्या हिताचे निर्णय घेतले पाहिजेत.समाजकारणामध्ये राजकारणामध्ये काम करत असताना आम्ही सुद्धा अशा अनेक ठिकाणी सहकारी संस्थेमध्ये चांगल काम करत आलो म्हणुन जनतेने मला महाराष्ट्राच्या विधानसभेमध्ये पाठवले."
राजेश पाटील म्हणाले, "तुमच्या गावातला विकास किती झाला? तुमच्या गावांमध्ये विकासाची निधी किती आला? हे सर्व तुम्हाला ज्ञात आहे. पण आज त्याबाबतीत सुद्धा आकंड-तांडव करणारी आणि सोळाशे कोटीचा विकास हा कागदावर झाला म्हणणारी मंडळी आहेत. त्यांना कावीळ झाले की काय, त्यांच्या डोळ्यांना हा विकास दिसत नाही. हा एक सुद्धा संशोधनाचा विषय आहे. मी त्यांना उत्तर द्यायला जाणार नाही. कारण का मला विश्वास आहे, जनताच येणाऱ्या नोव्हेंबरमध्ये महाराष्ट्र विधानसभेच्या निवडणूक वेळी योग्य उत्तर दिल्याशिवाय राहणार नाही."
पुढे बोलताना ते म्हणाले, "आज या कार्यक्रमाच्या निमित्ताने आपण सर्वांनी मला निमंत्रित केले. स्वामीजींचा आशीर्वाद आणि तुमच्या सर्वांचे दर्शन त्या निमित्ताने घडले. ही संस्था भरभराटीला येवो, सर्व संचालक मंडळाच्या हातून चांगलं कार्य घडो आणि इथल्या सर्व शेतकऱ्यांचा हित जोपासण्याचं काम व्हावं.
या कार्यक्रमाला श्री गुरुसिध्देश्वर महास्वामीजी,माजी राज्यमंत्री भरमुअण्णा पाटील, जिल्हा बँकेचे संचालक संतोष पाटील,वर्षाताई नाडगोंडा, माझी जि.प. सदस्या रेखाताई हत्तरकी, जिल्हा शेतकरी संघाचे संचालक जयकुमार मुन्नोळी, सरपंच भारती रायमाने, जिल्हा मजूर संघाचे संचालक दिपक पुजारी, संताराम पाटील, तुकाराम बेनके, वसंतकाका चौगुले, रामगोडा जिन्नानावर, सातगोंडा जिन्नानावर,आण्णाप्पा मनिकेरी, नौकुडचे सरपंच शुक्राचार्य चोथे भागोजी कामिनकर,भरत रोणपी ,माजी जि.प. चंद्रशेखर पारील, शिवानंद घस्ती सर, अशोक धुळ्ळानावर, बसवराज कापसे, सागर शिंदे, सुरेश मन्नीकरी, सुभाष पाटोळे, विरपाक्ष टोणपी, प्रसाद जाधव, प्रताप चव्हाण, बबन पाटोळे, सुशांत नौकुडकर, विनायक यद्दूरकर, सुजित पाटील (हळकर्णी) आदींसह संस्थेचे सभासद आणि ग्रामस्थ मोठ्या संख्येने उपस्थित होते.