गडहिंग्लज :विद्यार्थ्यांनी ज्ञानातून आपल्या आयुष्याची वाटचाल सक्षम करणे गरजेचे आहे. तारुण्याच्या काळात विद्यार्थ्यांनी आपले कर्तुत्व गाजविणे गरजेचे आहे. आपल्याला मिळालेल्या आयुष्यात कर्तुत्व सिद्ध करावे. जगाच्या स्पर्धेत स्वतःला सिद्ध करण्याची ताकद विद्यार्थ्यांमध्ये निर्माण होणे गरजेचे आहे. आजच्या या काळात भरकटलेल्या तरुणांनी चित्रपट, मोबाईल पासून दूर राहून आपले जीवन घडविले पाहिजे तरच आपल्या आयुष्याची वाटचाल अधिक भक्कम होईल. खरेतर वाचनातून माणूस खऱ्याअर्थी घडतो. विद्यार्थ्यांनी या कॉलेज जीवनातच आपली वाटचाल भक्कम व्हावी यासाठी पुस्तके वाचणे गरजेचे आहे. खरेतर जीवन सुंदर आहे त्या जीवनात सकारात्मक दृष्टिकोन ठेवून आपण आपली वाटचाल करावी. जीवनात आपणाला काय करायचे आहे हे विद्यार्थ्यांनी आत्ताच ठरविले पाहिजे आणि त्यादृष्टीने प्रयत्न केले पाहिजे तरच आपण यशस्वी व्हाल असे प्रतिपादन मुरगुड येथील सदाशिवराव मंडलिक महाविद्यालयाचे प्राचार्य डॉ. शिवाजीराव होडगे यांनी केले. येथील शिवराज महाविद्यालयात बी.एस्सी भाग एक व एम. एस्सी भाग एकमधील नवागत विद्यार्थ्यांच्या स्वागत समारंभात ते बोलत होते. अध्यक्षस्थानी शिवराज विद्या संकुलाचे अध्यक्ष प्राध्यापक किसनराव कुराडे होते. या कार्यक्रमाची सुरुवात कुंडीतील रोपाला मान्यवरांच्या हस्ते पाणी घालून करण्यात आले. या कार्यक्रमात संस्थेचे अध्यक्ष प्रा. किसनराव कुराडे यांनी आपल्या मार्गदर्शनात विद्यार्थ्यांनी आपल्या आयुष्यात कोणत्या वेळी काय करायचे आहे हे नेमकेपणाने जाणून घेऊन त्यादृष्टीने प्रयत्नशील राहणे गरजेचे आहे. शिक्षणातून खूप काही करण्याची संधी आहे. विद्यार्थ्यांनी या संधीचा लाभ घेणे काळाची गरज आहे. विद्यार्थ्यांनी शिवराज विद्या संकुलात पदवी व पदव्यूत्तर व त्यापुढचे शिक्षण घेऊन आपले करिअर घडवावे. भारतीय विद्यार्थ्यांना जगभर मोठ्या प्रमाणात संधी आहेत. या संधीचं सोनं करून घेण्यासाठी आणि मिळणाऱ्या संधीतून जग जिंकण्याची उमेद विद्यार्थिनी विद्यार्थिनी बाळगली पाहिजे असे प्रतिपादन प्रा. किसनराव कुराडे यांनी आपल्या अध्यक्षीय भाषणातून केले. यावेळी प्राचार्य डॉ. एस एम. कदम यांनीही महाविद्यालयाच्या विविध उपक्रमांचा आढावा घेत शिवराज विद्या संकुलात उपलब्ध असलेल्या विविध कोर्सेसचा लाभ घेऊन जीवनात यशस्वी झाले पाहिजे असे त्यांनी स्पष्ट केले. याप्रसंगी शिवराज विद्या संकुलाचे उपाध्यक्ष अॅड. दिग्विजय कुराडे, केमिस्ट्री विभाग प्रमुख डॉ.ए. एम. हसुरे. नॅक समन्वयक प्रा. किशोर आदाटे, प्रा. विश्वजीत कुराडे, प्रा. डॉ. विजय सावंत, प्रा. सुशांत पांगम, प्रा.गौरव पाटील यांच्यासह सायन्स विभागाचे सर्व प्राध्यापक, प्रशासकीय कर्मचारी विद्यार्थी- विद्यार्थिनी उपस्थित होते. प्रारंभी स्वागत व प्रास्ताविक कु.सानिका जगताप यांनी केले. या कार्यक्रमाचे सूत्रसंचालन कु.अमृता सागर यांनी केले तर आभार कु. समीक्षा पन्हाळकर यांनी मांनले.