गडहिंग्लज : विद्यार्थ्यांनी सोशल मिडीयाचा वापर चांगल्या गोष्टीसाठी करणे आवश्यक आहे. आजकाल ज्या घटना घडत आहेत, ते तुम्ही पाहत आहे. चुकीचा स्टेटस ठेऊन कायदा व सुव्यवस्था बिघडू नये याची सर्वांनी खबरदारी घेणे गरजेचे आहे. असे प्रतिपादन गडहिंग्लज पोलीस स्टेशनचे पोलीस उपनिरीक्षक समाधान घुगे यांनी केले. येथील शिवराज महाविद्यालय व गडहिंग्लज पोलीस ठाणे यांच्या संयुक्त विद्यमाने आयोजित शांतता सलोखा मार्गदर्शन कार्यक्रमात ते बोलत होते. प्रारंभी शिवराज विद्या संकुलाचे अध्यक्ष प्रा. किसनराव कुराडे यांनी या शांतता सलोखा बाबत मार्गदर्शन करून महाविद्यालयात विद्यार्थ्यांसाठी आयोजित करण्यात आलेल्या मार्गदर्शन बाबत सविस्तर मार्गदर्शन केले. शाहीर सदानंद शिंदे यांनी आपल्या शाहिरीतून सलोखाबाबत जनजागृती केली. यावेळी मार्गदर्शन करताना पोलीस उपनिरीक्षक समाधान घुगे यांनी सर्व युवा पिढी हे आपल्या देशाचे भवितव्य घडविणारी पिढी आहे. युवा पिढीने चांगले शिक्षण घेऊन आपले करिअर घडविणे गरजेचे आहे. आपल्या मिळणाऱ्या शिक्षणाचा विद्यार्थ्यांनी चांगल्या गोष्टीसाठी सदुपयोग करणे गरजेचे आहे. मोबाईलवर चुकीचे स्टेटस ठेऊन अथवा चुकीच्या गोष्टीला बळी पडू नये याची वेळीच खबरदारी घेणे गरजेचे आहे. सोशल मिडीयाचा गैरवापर करू नका. विद्यार्थ्यांनी याबाबत कटाक्ष पाळणे गरजेचे असल्याचे त्यांनी सांगितले.
पोलीस निरीक्षक श्री गजानन सरगर यांनीही विद्यार्थ्यांनी आपले करिअर चांगल्या पद्धतीने घडविण्यासाठी प्रयत्न केले पाहिजे. आपले करिअर घडविण्यात आपल्या आई- वडिलांचे व शिक्षकांचे कष्ट मोलाचे आहेत. त्यांचा आदर ठेवणे महत्वाचे आहे. आपण आता शिक्षण घेत जीवनाच्या मुख्य टप्प्यावर येऊन पोहोचला आहात. आपले करिअर घडताना कोणतीही चुकीची गोष्ट करू नका, आपल्या करिअरला अडथळ निर्माण होणाऱ्या वाईट गोष्टीपासून दूर राहावे असे आवाहन पोलीस निरीक्षक श्री सरगर यांनी विद्यार्थ्यांना केले.
यावेळी राष्ट्रसेवा दलाचे श्री हसन देसाई, श्री पाटोळे, संस्थेचे उपाध्यक्ष अॅड. दिग्विजय कुराडे, संस्थेचे बसवराज आजरी, श्री नंदनवाडे गुरुजी, मनसेचे जिल्हाध्यक्ष श्री नागेश चौगुले, केमिस्ट्री विभाग प्रमुख डॉ.ए.एम. हसुरे यांच्यासह अन्य मान्यवर, प्राध्यापक, प्रशासकीय सेवक, विद्यार्थी-विद्यार्थिनी उपस्थित होते. पर्यवेक्षक प्रा. तानाजी चौगुले यांनी कार्यक्रमाचे सूत्रसंचालन केले...
