कोवाड, ता. २ : चंदगड आगाराने कोवाड भागातील प्रवाशांच्या सोयीसाठी कोवाडहून दुंडगेमार्गे कोल्हापूरला नवीन गाडी सुरू करावी, अशी मागणी प्रवासी करत आहेत. तालुक्यातील सर्वात मोठ्या लोकवस्तीची गावे या परिसरात आहेत. त्यामुळे कोल्हापूरला जाणाऱ्या प्रवाशांची संख्या अधिक आहे. चंदगड आगाराची सकाळी सव्वासहा वाजता कोवाडहून कागणीमार्गे कोल्हापूरला जाणारी एक बस सुरू आहे; पण या बसला गर्दी असते. प्रवाशांना उभे राहून प्रवास करावा लागतो. अनेकवेळा गर्दीमुळे प्रवाशांना गाडीत चढता येत नाही. शालेय विद्यार्थी, व्यापारी, नोकरदार, पर्यटक व शासकीय कामासाठी कोल्हापूरला दररोज जाणाऱ्यांची संख्या जास्त आहे. त्यासाठी दुंडगेमार्गे दुसरी गाडी सुरू करावी, अशी मागणी होत आहे. दुंडगेमार्गे गाडी सुरू झाली तर तेऊरवाडी, हडलगे, निट्टूर, कोवाड, मलतवाडी, घुल्लेवाड, चिंचणे, कामेवाडी, लकिक्कटे, म्हाळेवाडी, शिवनगे, माणगाव, किणी व नागरदळे येथील प्रवाशांची चांगली सोय होणार आहे. कोल्हापूरला जाणाऱ्या प्रवाशांची संख्याही जास्त असल्याने यातून आगाराला व्यवसायही चांगला मिळणार असल्याने आगारप्रमुखांनी याचा अभ्यास करून ही गाडी सुरू करावी, अशी मागणी होत आहे.
