गडहिंग्लज : हसूरचंपू (ता.गडहिंग्लज) येथे एका तरुणाने दारूच्या नशेत आंब्याच्या झाडाला गळफास घेऊन आत्महत्या केली. सुनील बाळू तोडकर (वय.२७) असे आत्महत्या केलेल्याचे नाव आहे. आज सकाळी सातच्या सुमारास ही घटना निदर्शनास आली. पोलिसांनी सांगितले की, सुनील हा इलेक्ट्रिकची कामे करीत होता. त्याला दारूचे व्यसन होते. सोमवारी रात्री साडेआठला 'कुरण' नावाच्या शेतातील घराकडे झोपण्यास जातो, असे सांगून तो घराबाहेर पडला. आज सकाळी तो वेळेत घरी आला नाही. दरम्यान, आज सकाळी शेताकडे गेल्यानंतर वडील बाळू यांना आंब्याच्या झाडाच्या फांदीला नायलॉन दोरीने गळफास लावून घेतल्याच्या अवस्थेत आढळला. त्यानंतर त्यांनी पोलिसांत याबाबतची फिर्याद दिली आहे. अधिक तपास पोलीस करीत आहेत.
