माजी मंत्री हसन मुश्रीफ यांच्याशी संबंधित मिनी लॉन्ड्रीच्या प्रकरणात अंमलबजावणीस संचालनालयाने (ईडी) पुण्यात मोठी कारवाई सुरू केली आहे. सोमवारी सकाळीच पुण्यात नऊ ठिकाणी एकाचवेळी ईडी छापे टाकल्याने खळबळ उडाली.
मुश्रीफ यांच्याशी संबंधित पुण्यातील व्यवसायिकांच्या घरी ही कारवाई केली आहे. व्यवसायिक विवेक गव्हाणे,सीए जयेश दुधडिया आणि ब्रिक्स कंपनीचे संचालक चंद्रकांत गायकवाड यांच्यावर ईडीने छापेमारी केली आहे.सॅलिसबरी पार्क, गणेश पेठ, हडपसर प्रभात रोड ,सिंहगड रोडसह इतर ठिकाणी ही कारवाई केली.
मुश्रीफ यांच्याशी संबंधित वेगवेगळ्या व्यवसायिकांशी नेमके कोणत्या प्रकारचे आर्थिक व्यवहार झाले आहेत. याची कोणती कागदपत्रे आहेत, त्याबाबत कोणते पुरावे मिळू शकतात का, याबाबतीची तपासणी इडीच्या पथकामार्फत करण्यात येत असल्याची माहिती सूत्राने दिली. मुश्रीफ यांच्याशी संबंधित नातेवाईक तसेच व्यावसायिकांवर यापूर्वीही धाडी टाकत कारवाई केली आहे.
