गडहिंग्लज- चंदगड राज्य मार्गावर लाकूडवाडी घाटात बुधवारी रात्री झालेल्या अपघातात महागावचा युवक ठार झाला. सिद्धेश महादेव जाधव (वय २३) असे त्याचे नाव आहे. अपघाताची नोंद गडहिंग्लज पोलिसात करण्यात आली आहे.नेसरीजवळील हेळेवाडी गावच्या परिसरात यात्रेसाठी सिद्धेश मित्राकडे जेवणासाठी गेला होता. जेवण करून लाकूडवाडी घाटमार्गे महागावला घरी परतत असताना घाटातील पोल्ट्रीच्या पुढे मोरीजवळ बुलेट स्लिप झाल्याने पडून तो गंभीर जखमी झाला.
माहिती मिळताच नातेवाईकांनी १०८ रुग्णवाहिका बोलावली. रुग्णवाहिकेवरील डॉक्टरांनी हा युवक मृत झाल्याचे सांगितले. याबाबतची फिर्याद किरण पताडे यांनी दिली आहे. सिद्धेश याचा दोन दिवसांपूर्वी वाढदिवस झाला होता. ॲनिमेशन कोर्स त्याने पूर्ण केला होता. त्याच्या निधनाने महागाव परिसरात हळहळ व्यक्त होत आहे. हरळी खुर्द येथील हिरण्यकेशी विद्यालयाचे सहाय्यक शिक्षक महादेव जाधव यांचा तो मुलगा होय. त्याच्या पश्चात आई, वडील, बहीण, आजी असा परिवार आहे.
