मुंबई :राज्यातील गरजू पत्रकारांच्या मुला-मुलींच्या शिक्षण, कला, क्रीडा आणि संशोधन क्षेत्रातील करिअरसाठी तसेच त्यांच्या कुटुंबांच्या आरोग्यविषयक गरजांसाठी 'प्रतिबिंब प्रतिष्ठान' मदत करणार आहे, अशी माहिती संस्थापक अध्यक्ष राजा माने यांनी दिली.
विशेष गुणवत्ता व नैपुण्य असणाऱ्या पाल्यांसाठी मदतीचे प्रस्ताव पाठवावेत, असे आवाहन त्यांनी केले असून, मुलींच्या शिक्षणाला प्रतिष्ठान विशेष प्राधान्य देणार आहे.
राज्यातील गरजू व पात्र पत्रकारांनी आपले प्रस्ताव विभागातील डिजिटल मिडिया संपादक पत्रकार संघटनेच्या अध्यक्ष किंवा उपाध्यक्षाच्या शिफारसीसह ५ मे २०२५ पर्यंत पाठवावेत. अर्ज pratibimbapratishthan1@gmail.com या ईमेलवर किंवा 9922928152 या व्हॉट्सॲप क्रमांकावर पाठवावेत.
गेल्या वर्षी कणेरी मठ (कोल्हापूर) येथे झालेल्या पत्रकार संघटनेच्या अधिवेशनात उच्च व तंत्रशिक्षण मंत्री चंद्रकांतदादा पाटील यांनी पत्रकारांच्या कुटुंबासाठी खास मदत करणारे प्रतिष्ठान स्थापन करण्याचा सल्ला दिला होता. त्यांच्या सूचनेनुसार आणि लोकवर्गणीच्या सहकार्याने 'प्रतिबिंब प्रतिष्ठान'ची स्थापना करण्यात आली आहे.
“खऱ्या गरजू पत्रकार कुटुंबांचे हित पारदर्शी पद्धतीने जपण्याचा आमचा प्रयत्न राहील,” असे अध्यक्ष राजा माने यांनी नमूद केले.
