शिवराज महाविद्यालय जागतिक महिला दिन साजरा

गडहिंग्लज : स्त्रिया या आर्थिकदृष्ट्या साक्षर झाल्या पाहिजे. देशात 75 टक्के लोक साक्षर आहेत. 17% आर्थिक दृष्ट्या साक्षर आहेत. स्त्रिया या उत्तमरित्या आर्थिक व्यवस्थापन करू शकतात. कुटुंबातील गरजा कोणत्या महत्त्वाच्या आहेत शिवाय त्यासाठी असणारे उत्पन्नाचे स्तोत्र किती आहे याचा आर्थिक ताळमेळ बसवून आर्थिक नियोजन योग्यरित्या करतात. आपल्याकडे असणाऱ्या पैशाचे योग्य ते नियोजन करून काटकसर करत असतात त्यामुळे या काटकसरीतून भविष्यात निर्माण होणाऱ्या अडचणी सोडवण्यासाठी या काटकसरीतील आर्थिक तिचा उपयोग परिपूर्ण करतात. गृहिणीनी आपल्या कौटुंबिक गरजा भागवण्यासाठी कुटुंबातील इतरांवर अवलंबून न राहता स्वयंपूर्ण होण्याचा प्रयत्न केला पाहिजे. महिलांनी आर्थिकदृष्टया सक्षम झाल्या पाहिजे असे प्रतिपादन पदव्युत्तर विभाग प्रमुख डॉ.महेश चौगुले यांनी ‘स्त्रियांची आर्थिक साक्षरता’ या विषयावर मार्गदर्शन करताना केले.

येथील शिवराज महाविद्यालयात महिला सबलीकरण समिती व महिला छळ प्रतिबंधक समिती यांच्या संयुक्त विद्यमाने आयोजित जागतिक महिला दिनानिमित्त आयोजित ‘एकदिवसीय कार्यशाळा व प्रश्नमंजुषा स्पर्धा पारितोषिक वितरण समारंभात ते बोलत होते. या कार्यक्रमाच्या अध्यक्षस्थानी प्राचार्य डॉ. एस. एम. कदम होते. तर सामाजिक कार्यकर्त्या सौ. रेखा पोतदार यांची प्रमुख उपस्थिती लाभली. प्रारंभी स्वागत व प्रास्ताविक महिला छळ प्रतिबंधक समिती प्रमुख प्रा. सौ. बिनादेवी कुराडे यांनी केले. या कार्यक्रमात पालक सुमन कांबळे यांचे राष्ट्रसेवा दलातील कार्याबद्दल, ‘चिंध्यांच्या बाहुल्या’ या कादंबरीला पुरस्कार मिळाल्याबद्दल डॉ.श्रद्धा पाटील यांचा सत्कार. ग्रीन कॉलेज व क्लीन कॉलेज स्पर्धेतील विजेते विद्यार्थी व प्राध्यापक तसेच प्रश्नमंजुषा, चित्रकला, व अन्य स्पर्धेतील विजेत्यांना मान्यवरांच्या हस्ते गौरविण्यात आले. यावेळी सामाजिक कार्यकर्त्यां सौ. रेखा पोतदार यांनी आपल्या मार्गदर्शनात महिला या सर्वच क्षेत्रात अग्रेसर आहेत. त्या विविध क्षेत्रात चमकतही आहेत. समाजात त्यांनी केलेल्या कार्याची नोंद होत आहे. याचा आम्हाला अभिमान वाटतो असे त्यांनी सांगितले. या कार्यक्रमात प्राचार्य डॉ.एस.एम.कदम यांनी अध्यक्षीय भाषणातून मार्गदर्शन केले. नॅक समन्वयक प्रा.किशोर आदाटे यांनी मार्गदर्शन केले. या कार्यक्रमास शिवराज इंग्लिश मेडियम स्कूलचे मुख्याध्यापक श्री ए.बी.पाटील. यांच्यासह प्राध्यापक, शिवराज इंग्लिश मेडियम स्कूलच्या शिक्षिका व स्टाफ उपस्थित होते. या कार्यक्रमाचे सूत्रसंचालन प्रा.बियामा वाटंगी यांनी केले तर आभार महिला सबलीकरण समितीच्या प्रमुख प्रा.पौर्णिमा पाटील यांनी मानले.