गडहिंग्लज : शिवराज कॉलेज ऑफ फार्मसी महाविद्यालयाचे वार्षिक स्नेहसंमेलन उत्साहात संपन्न झाले. या स्नेहसंमेलनानिमित्त विविध गुणदर्शनाचा बहारदार कार्यक्रम संपन्न झाला. या कार्यक्रमाचे प्रमुख अतिथी म्हणून श्री उदयराव जोशी आणि श्री बसवराज खणगांवे यांची उपस्थिती लाभली. अध्यक्षस्थानी शिवराज विद्या संकुलाचे अध्यक्ष प्रा. किसनराव कुराडे होते. या कार्यक्रमात मान्यवरांच्या हस्ते दीपप्रज्वलन करण्यात आले. प्रारंभी प्राचार्य डॉ. राहुल जाधव यांनी स्वागत करून प्रास्ताविकात फार्मसीच्या विविध उपक्रमांचा आढावा घेतला. यावेळी प्रमुख अतिथी श्री उदयराव जोशी यांनी विद्यार्थ्यांना मार्गदर्शन करताना विद्यार्थ्यांच्या सुप्त गुणांना वाव मिळण्याचे महाविद्यालय हे एकमेव व्यासपीठ आहे. महाविद्यालयीन जीवनात स्नेहसंमेलन हा असा सोहळा आहे कि, यातून आपल्या कलागुणांना व्यासपीठ मिळते. स्नेहसंमेलन हे केवळ कार्यक्रमाचे संचलन नाही तर मैत्री, सामंजस्य आणि नवनिर्मितीचे प्रतिक असल्याचे प्रतिपादन त्यांनी केले. संस्था सचिव डॉ. अनिलराव कुराडे यांनी आपल्या मार्गदर्शनामध्ये विदायार्थ्यांनी आपल्या कला स्नेहसंमेलनाच्या रंगमंचावर सादर करून आपल्या कलेची जोपासना करणे गरजेचे आहे. त्यासाठी विद्यार्थी कलासक्त असला पाहिजे असे प्रतिपादन केले. संस्थेचे उपाध्यक्ष अॅड. दिग्विजय कुराडे संचालक प्रा.विश्वजित कुराडे, यांच्यासह प्राध्यापक, प्रशासकीय कर्मचारी विद्यार्थी-विद्यार्थिनी उपस्थित होते. यावेळी महाविद्यालयाच्या विद्यार्थी-विद्यार्थिनी कलाकारांनी हिंदी, मराठी, गीतांची गायनातून बरसात केली तसेच व देशभक्ती, लावणी, जोगवा, गोंधळ, महाराष्ट्रीय लोक परंपरा, लोकसंस्कृतीचे दर्शन घडवत व हिंदी, मराठी, रिमिक्स गाण्याच्या तालावर थिरकत बहारदार नृत्याचा अविष्कार करून रसिकांना मंत्रमुग्ध केले. यावेळी महाविद्यालयातील गुणवंत, विद्यार्थी - खेळाडूंना मान्यवरांच्या हस्ते पारितोषिक देऊन गौरविण्यात आले. या कार्यक्रमाचे संयोजन सांस्कृतिक विभाग प्रमुख प्रा. अनघा पाटील आणि प्रा. सुमन अडीसरे यांनी केले तर सूत्रसंचालन प्रा. किरण जाधव यांनी केले.