एटी फाऊंडेशन या संस्थेने भारत विकास ग्रुप यांच्या संयुक्त विद्यमाने सालाबाद प्रमाणे प्रजासत्ताक दिना निमित्त रविवार, दि. ३१ जानेवारी २०२५ रोजी माजी सैनिकांसाठी तिसरी वॉकिंग फुटबॉल स्पर्धा उत्साहात पार पाडली.
आपल्या देशाचे रक्षण करून, देशवासियांच्या शक्तीचा आधारस्तंभ म्हणून कार्यरत राहून सैनिकांनी केलेल्या सर्व बलिदानांसाठी, सैनिकांचा सन्मान करणे व त्याचबरोबर या खेळाद्वारे त्यांच्या शारीरिक आणि मानसिक आरोग्यामध्ये उत्तम समन्वय रहावा हे या स्पर्धेचे उद्दिष्ट आहे असे अंजू तुरंबेकर, माजी राष्ट्रीय खेळाडू, आंतरराष्ट्रीय फुटबॉल प्रशिक्षिका व संस्थापिका, एटी फाउंडेशन यांनी सांगितले.
टी बी चव्हाण, माजी खेळाडू, पंच व माजी प्राचार्य साधना हायस्कूल, यांच्या हस्ते स्पर्धेचे उद्घाटन करण्यात आले.
स्पर्धेमध्ये विविध गावच्या ८ संघांनी भाग घेवून तब्बल ८० माजी सैनिकांनी सहभाग नोंदवला. तसेच विविध गावच्या अनेक माजी सैनिकांनी बघ्याची भूमिका घेत स्पर्धेची शोभा वाढवली. विशेष म्हणजे वडरगे गावचे यशवंत आडावकर वय वर्षे ७६ यांनी स्पर्धेमध्ये भाग घेवून धमाकेदार खेळी केली. त्यांचा विशेष सत्कार करण्यात आला.
गडहिंग्लज चे प्रांताधिकारी, एकनाथ काळबांडे यांनी स्पर्धेदरम्यान सर्व सैनिकांना भेटून शुभेच्छा दिल्या. स्पर्धेच्या सांगता समारंभा वेळी डी वाय एस पी रामदास इंगवले व ॲड हेमंत कोलेकर यांच्या हस्ते बक्षिस वितरण करण्यात आले. डी वाय एस पी रामदास इंगवले यांना चालून फुटबॉल खेळणे हा प्रकार खुप आवडला असे सांगत, सर्व सैनिकांच्या फिटनेस ची वाहवा केली. अशी वेगळी स्पर्धा भरवल्याबद्दल अंजू तुरंबेकर व फाउंडेशन च्या सर्व कार्यकर्त्यांचे त्यांनी कौतुक केले.
स्पर्धा अंजू तुरंबेकर यांच्या मार्गदर्शनाखाली पार पडली. अनिल पाटील, क्रीडा शिक्षक व एटी फाउंडेशन बोर्ड मेंबर यांनी सूत्रसंचालन केले. विनय नाईक, सचिन मगदूम, शशिकांत चौगुले यांचे सहकार्य लाभले. एटी फाउंडेशन चे प्रशिक्षक शैलेश दळवी व अल्तमश खान यांनी पंच म्हणून काम पाहीले. एटी फाउंडेशन चे लीडर्स, अक्षय पावले, वैभवी पाटील, कस्तुरी कदम, आकाश पाटील, वृषभ किनिंगे, सानिका रेडेकर, सुलक्षणा पावले व एटीएफ गिजवणे हायस्कूल सेंटर च्या खेळाडूंनी परिश्रम घेतले. कुमार पाटील यांनी आभार मानले.
स्पर्धेचे विजेते खालीलप्रमाणे:
प्रथम क्रमांक: गडहिंग्लज संघ
द्वितीय क्रमांक: नूल संघ
तृतीय क्रमांक: नेसरी संघ
उत्कृष्ट खेळाडू : भैरू मोदर
बेस्ट गोलकीपर : शिवानंद चिमगुडे
टॉप स्कोरर : रविंद्र थोरात