गडहिंग्लज : शहरातील १३ कोटीच्या विविध विकासकामांचा शुभारंभ शनिवारी दुपारी जिल्हयाचे पालकमंत्री हसन मुश्रीफ यांच्या हस्ते करण्यात येणार आहे. गडहिंग्लज शहराला आतापर्यंत मंत्री मुश्रीफ यांच्या माध्यमातून उच्चांकी १०० कोटींचा निधी मिळाल्याचे सांगण्यात आले.
या शुभारंभ कार्यक्रमात प्रामुख्याने हिंदू व लिंगायत स्मशानभूमीचा विकास, हाळलक्ष्मी परीसर सुशोभिकरण, दत्त मंदिर परिसरात सभागृह बांधणे, मरगुबाई मंदिरासमोर सांस्कृतिक सभागृह बांधकाम यासह शहरातील विविध भागातील रस्ते खडीकरण, डांबरीकरण, गटारींचे बांधकाम आदींचा समावेश आहे. गडहिंग्लज शहराला पालकमंत्री मुश्रीफ यांच्या माध्यमातून आतापर्यंत १०० कोटींचा निधी मिळाला आहे. यात प्रामुख्याने तालुका क्रीडांगण, उपजिल्हा रुग्णालयातील सुविधा, पाणीपुरवठा योजना, शहरातील विविध मंदिरांचे सुशोभिकरण, एम. आर. हायस्कूल येथे प्रेक्षक गॅलरी, वाढीव हद्दीतील विविध वसाहतीसाठी रस्ते, गटारीसाठी मोठा निधी मिळाला आहे. विविध कामांचा शुभारंभ काळभैरी मंदिरं, ताशिलदार गल्ली नदीवेस येथे पालकमंत्री मुश्रीफ यांच्या हस्ते शनिवारी सायंकाळी ६ वाजता करण्यात येणार आहे. यावेळी राष्ट्रवादीचे युवा कार्यकर्ते रामगोंड पाटील आणि कारखाना संचालक शिवराज पाटील यांच्या वाढदिवसाचेही नियोजन केले आहे. या कार्यक्रमाला माजी उपनगराध्यक्ष किरण कदम, माजी जि. प. उपाध्यक्ष सतिश पाटील, राष्ट्रवादीचे संघटक उदयाराव जोशी, सुरेशराव कोळकी, माजी नगराध्यक्ष वसंतराव यमगेकर, माजी नगरसेवक हारुण सय्यद, माजी नगराध्यक्ष बसवराज खणगावे यांची उपस्थिती रहाणार आहे. राष्ट्रवादीचे शहराध्यक्ष सिध्दार्थ बन्ने, महिला शहराध्यक्षा शर्मीला पोतदार, जिल्हा उपाध्यक्ष महेश सलवादे यांनी या कार्यक्रमास उपस्थित रहाण्याचे आवाहन केले आहे...