गडहिंग्लज : महात्मा जोतीराव फुले आणि क्रांतीज्योती सावित्रीबाई फुले यांचे कौटुंबिक व सामाजिक जीवन हा सर्वकालीन मानवी समाजासमोरचा आदर्श वस्तुपाठ आहे. या आदर्श पती-पत्नींनी दीडशे वर्षापूवीं ज्या पद्धतीने समाजाला परावर्तीत करण्यासाठी आपले जीवन व्यतीत केले ते केवळ वाचण्यापुरते, सांगण्यापुरते आणि ऐकण्यापुरते मर्यादित राहू नये तर सर्व जाती-धर्मातील व्यक्तींना त्यांच्या विचारांची व आचारांची ज्योत आप-आपल्या कौटुंबिक पातळीवर प्रज्वलीत केली पाहिजे हा दृष्टीकोन समोर ठेऊन ज्येष्ठ साहित्यिक प्रा. किसनराव कुराडे आणि त्यांच्या पत्नी सौ. क्रांतीदेवी कुराडे यांनी लिहिलेला शोधनग्रंथ हा खरोखरच आदरणीय व स्विकारणीय स्वरूपाचा आहे. असे उदगार अखिल भारतीय मराठी साहित्य संमेलनाचे माजी अध्यक्ष व थोर विचारवंत डॉ. श्रीपाल सबनीस यांनी काढले.
गणपतपुळे जि.रत्नागिरी येथे प्रा. कुराडे दांपत्यांनी लिहिलेल्या 'सत्यबोधक फुले दांपत्य अजरामर आचारवंत' या चरित्रात्मक ग्रंथाच्या प्रकाशन समारंभामध्ये ते बोलत होते. अविष्कार इंटरनॅशनल फाउंडेशन ऑफ इंडिया यांच्यावतीने आयोजित केलेल्या या समारंभात सदर पुस्तकाच्या प्रकाशनाबरोबरच महाराष्ट्रातील पंच्याहत्तर नामवंत शिक्षकांना प्रोत्साहनपत्र देऊन सत्कार करण्यात आला. सदर समारंभात लेखक प्रा. कुराडे, सौ. क्रांतीदेवी कुराडे, श्री संजय पवार, डॉ. विशाल पेटकर (रत्नागिरी), सौ. चंद्रकलाताई पाचंगे (पंढरपूर), वर्षा बिराजदार (लातूर), श्री सुरेश कोळी (इचलकरंजी) यांनीही फुले दांपत्यांच्या संदर्भात आपले विचार व्यक्त केले. या कार्यक्रमास सौ.ललिता सबनीस यांच्यासह अनेक नामवंत शिक्षक व विचारवंत हजर होते. श्री संदीप पर्वतकर यांच्या आभार प्रदर्शनानंतर हा साहित्यिक शिक्षक विचारवंतांचा मेळावा संपन्न झाला.