गडहिंग्लज : येथील शिवराज महाविद्यालयात क्रीडा व एन.सी.सी. विभागामार्फत पालक मेळावा संपन्न झाला. अध्यक्षस्थानी प्राचार्य डॉ. एस. एम. कदम होते. तर प्रमुख अतिथी म्हणून शिवराज विद्या संकुलाचे अध्यक्ष प्रा. किसनराव कुराडे उपस्थित होते. तर शिवराज विद्या संकुलाचे डॉ. अनिल कुराडे यांची उपस्थिती लाभली. प्रारंभी स्वागत क्रीडा विभाग प्रमुख डॉ. राहुल मगदूम यांनी करून व प्रास्ताविकात खेळाडू आणि त्याचा आहार व पालकांची जबाबदारी याबाबत सांगितले.
या पालक मेळाव्यात शिवराज विद्या संकुलाचे अध्यक्ष प्रा. किसनराव कुराडे यांनी आपल्या मार्गदर्शनात महाविद्यालयाने क्रीडा क्षेत्रात आपली वेगळी अशी ओळख निर्माण केली आहे. राष्ट्रीय व आंतरराष्ट्रीय स्तरावर आजही महाविद्यालयाचे अनेक खेळाडू चमकत आहेत. तसेच शिवाजी विद्यापीठाची जनरल चॅम्पियनशिप सलग नऊ वर्षे पटकाविली आहे. याचा आदर्श डोळ्यासमोर ठेवून खेळाडूंनी प्रयत्न केले पाहिजे असे त्यांनी सांगितले. ऑलम्पिकमध्येही महाविद्यालयाच्या खेळाडूंनी आपल्या खेळाची चमक दाखविण्यासाठी सज्ज झाले पाहिजे असे प्रतिपादन केले.
सचिव डॉ. अनिलराव कुराडे यांनी आपल्या मार्गदर्शनामध्ये महाविद्यालयातील खेळाडूंना कोणत्याही गोष्टीची अडचण भासणार नाही. महाविद्यालयातर्फे सर्वतोपरी मदत करण्यात येणार असल्याचे स्पष्ट करून खेळाडूंनी आपल्या खेळातून शिवराजचे नांव उज्वल करावे असे आवाहन केले. प्राचार्य डॉ. एस.एम.कदम यांनीही खेळाडू व पालकांना मार्गदर्शन केले. या मेळाव्यास राष्ट्रीय अँथलेटिक खेळाडू विवेक मोरे, परशराम भोई, रोहन केसरकर तसेच खो-खो राष्ट्रीय खेळाडू युवराज बाबर व शुभम सुतार, प्राध्यापक, पालक, एन.सी.सी. कॅडेट, खेळाडू उपस्थित होते. आभार प्रा. जयवंत पाटील यांनी मानले.