तमिळनाडूमध्ये एक धक्कादायक घटना घडली आहे. येथील तिरुवन्नामलाई येथील एका महिलेला जमावाने मारहाण केली आहे. ही महिला बेशुद्ध होईपर्यंत तिला मारहाण करण्यात आली. १०० हून अधिक लोकांच्या जमावाने या महिलेला मारहाण केली आहे. या घटनेचा व्हिडीओ व्हायरल होत असतानाच यासंबंधी आणखी एक व्हिडीओ समोर आला आहे. या महिलेच्या पतीने जो भारतीय सैन्यातला जवान (सध्या काश्मीरमध्ये तैनात) आहे त्याने एक व्हिडीओ शेअर केला आहे. या व्हिडीओद्वारे जवानाने तमिळनाडू सरकारकडे न्याय मागितला आहे.
या महिलेची परिस्थिती सध्या गंभीर आहे. तिला रुग्णालयात दाखल करण्यात आलं आहे. या महिलेच्या पतीने शेअर केलेल्या व्हिडीओत त्याने म्हटलं आहे की, “मी देशाला शत्रूंपासून वाचवण्यासाठी भारतीय सैन्यात दाखल झालोय, मी सध्या काश्मीरमध्ये तैनात आहे. माझ्या घरापासून शेकडो किलोमीटर दूर आहे. तिकडे माझ्या पत्नीला १२० गुंडांनी अर्धनग्न करून बेदम मारहाण केली आहे.” या व्हिडिओमध्ये तो हात जोडून गुडघ्यावर बसून न्याय मागताना दिसत आहे.
दरम्यान, तमिळनाडू भाजपा प्रदेशाध्यक्षाने पीडित महिलेशी फोनवरून बातचित केली. त्यांनी ट्विट केलं आहे की, माझं हवालदार प्रभाकरन आणि त्यांच्या पत्नीशी फोनवर बोलणं झालं. त्यांचं दुःख ऐकून खूपन वेदना झाल्या. आपल्या तमिळ भूमीवर हा प्रकार घडल्याची मला लाज वाटते. आमच्या पक्षाचे स्थानिक पदाधिकारी या महिलेला भेटायला जाणार आहेत. भाजपा या महिलेला न्याय मिळवून देईल. तसेच आम्ही प्रभाकरन यांच्या कुटुंबाच्या पाठीशी आोत.
