आयपीएलच्या १६ व्या हंगामातील ४९ वा सामना चेन्नईच्या चिदंबरम स्टेडियममध्ये मुंबई इंडियन्स आणि चेन्नई सुपर किंग्ज यांच्यात रंगणार आहे. मुंबईचा कर्णधार रोहित शर्मा आणि चेन्नईचं नेतृत्व करणारा एम एस धोनी आमनेसामने येणार आहेत. आतापर्यंत झालेल्या १५ आयपीएल हंगामात मुंबईने पाचवेळा तर चेन्नईने चारवेळा विजयावर शिक्कामोर्तब केलं आहे. त्यामुळे मुंबई आणि चेन्नई यांच्यात नेहमीच हाय व्होट्लेज सामना होत असल्याचं पाहायला मिळालं आहे. दोन्ही संघामध्ये झालेल्या आतापर्यंतच्या सामन्यात मुंबईने बाजी मारली आहे. या दोन्ही संघांमध्ये एकूण ३७ सामने झाले आहेत. यामध्ये मुंबईने २१ सामन्यांत विजय संपादन केलं असून चेन्नईला १६ सामन्यांत विजय मिळवता आला आहे.त्यामुळे चेन्नई आणि मुंबईत होणारी कांटे की टक्कर पाहण्यासाठी चाहत्यांची उत्सुकता शिगेला पोहोचली आहे.