मुंगूरवाडी येथे माजी विद्यार्थी मेळावा व स्नेह सम्मेलन सोहळा संपन्न...

KolhapurLive
गडहिंग्लज :   शैक्षणिक क्षेत्रात उल्लेखनीय कार्य करणाऱ्या आणि उत्तमोत्तम विद्यार्थी घडविण्याची परंपरा असणाऱ्या विक्रम शिक्षण संस्थेचे सौ. वसुमता भिमराव नौकुडकर हायस्कूल, मुंगूरवाडी, ता. गडहिंग्लज येथील शाळेत 1994-95 साली दहावीत शिक्षण घेणाऱ्या विद्यार्थ्यांकडून नुकताच याच शाळेमध्ये माजी विद्यार्थी मेळावा व स्नेह सम्मेलनाचं  आयोजन करण्यात आले होते. 
कार्यक्रमाची सुरुवात माजी शिक्षकांच्या हस्ते दिप प्रज्वलनासह  छ. शिवाजी महाराज, छ. शाहू महाराज यांच्या प्रतिमा पुजनाने झाली. 
या कार्यक्रमात माजी विद्यार्थ्यांनी आपापले मनोगत व्यक्त करताना आपल्या शालेय जीवनातील आठवणींना उजाळा दिला तर शालेय जीवनात घडलेल्या गमतीजमती ऐकताना सर्वजण भूतकाळात हरवून गेले होते. आज विविध क्षेत्रात कार्यरत असणाऱ्या आपल्या विद्यार्थ्यांना पुन्हा भेटण्याची संधी मिळाल्याचा आणि त्यांच्याशी झालेल्या गप्पागोष्टीमुळे विशेष आनंद झाल्याचे मत यावेळी बोलताना तत्कालीन शिक्षकांनी व्यक्त केले. सर्व शिक्षकवर्गाने माजी विद्यार्थ्यांशी संवाद साधला त्याचबरोबर अनमोल असे मार्गदर्शनही केले.यावेळी सर्व शिक्षकांचा स्मृती चिन्ह,शाल श्रीफळ व गुलाबपुष्प देऊन सन्मान करण्यात आला.
या कार्यक्रमाला अगदी दूरवरून आलेले माजी सर्व शिक्षक,शिक्षिका, शिक्षकेतर कर्मचारी वर्ग तसेच सध्याचा सर्व शिक्षकवृंद विनंतीला मान देऊन उपस्थित होते.
तर १९९४ साली दहावीत असणाऱ्या विद्यार्थ्यांसह विद्यार्थीनींची संख्या वाखाणण्याजोगी होती. कार्यक्रमाचे सूत्रसंचालन आणि आभार प्रदर्शन माजी विद्यार्थी श्री संतोष बामणे, अभिजीत पाटील सर यांनी केले. 
    हा कार्यक्रम यशस्वी होण्यासाठी गावपातळीवर आणि इतर ठिकाणी नोकरी , व्यवसायानिमित्त असणाऱ्या सर्व माजी विद्यार्थी, विद्यार्थीनीनी अहोरात्र प्रयत्न केले.