गडहिंग्लज, ता. ३ : संकेश्वर-बांदा महामार्गाचे काम शेतकऱ्यांना विश्वासात न घेताच सुरू आहे. कोणतीही नोटीस न देता बेकायदा काम सुरू आहे. रितसर संपादनाची प्रक्रिया करूनच काम करायला हवे. अन्यथा येत्या आठवडाभरात काम बंद पाडण्याचा इशारा बाधित शेतकरी संघटनेने दिला आहे.
तहसीलदार ऋषीकेत शेळके यांना याबाबतचे निवेदन दिले आहे. त्यात म्हटले आहे की, संपादन अधिकाऱ्यांसमवेत शेतकऱ्यांची बैठक होणे आवश्यक आहे. परंतु तसे न करताच काम सुरु केले आहे. काम बंद पाडतेवेळी कायदा व सुव्यवस्थेचा प्रश्न निर्माण झाल्यास प्रशासन व संबंधित ठेकेदार कंपनी जबाबदार राहील. सर्व खात्याच्या संबंधीत अधिकाऱ्यांची व संघटनेची तातडीने बैठक घ्यावी. महामार्गाला शेतकऱ्यांचा विरोध नाही. मात्र रितसर भूसंपादन करुन बाधित शेतकऱ्यांना मोबदला मिळणे आवश्यक आहे. शेतकऱ्यांच्या नावावर सातबारा उताऱ्यावरील नोंद पाहून संपादन झाले पाहिजे. ही कार्यवाही त्वरीत करावी अशी मागणी आहे. शिवाजी गुरव, सुभाष कळेकर, अजित चव्हाण, कृष्णा क्षीरसागर, शिवाजी कदम यांच्या शिष्टमंडळाने हे निवेदन दिले आहे.
