चंदगड, ता. १६ : प्रत्येक धर्म सहिष्णुतेची शिकवण देतो. चंदगड शहरामध्ये हिंदू- मुस्लिम समाज अनेक वर्षांपासून एकत्र गुण्यागोविंदाने नांदतो. सामाजिक सलोख्याची ही परंपरा यापुढेही कायम ठेवूया, असे आवाहन चंदगड अर्बन बँकेचे अध्यक्ष दयानंद काणेकर यांनी केले. येथील जुम्मा मस्जीदतर्फे आयोजित इफ्तार पार्टीमध्ये ते बोलत होते.
मुस्लिम कमिटीचे अध्यक्ष शानूर मदार, अमजद मुल्ला, जुबेर आगा यांच्या हस्ते काणेकर यांचा सत्कार केला. मुस्लिम समाजाचे विविध प्रश्न सोडवण्याला प्राधान्य देण्यात आल्याचे काणेकर यांनी स्पष्ट केले. समाजाला ५५ लाखांचा निधी दिल्याबद्दल नौशाद मुल्ला यांनी आमदार राजेश पाटील, खासदार संजय मंडलिक, नगराध्यक्षा प्राची काणेकर यांचे आभार मानले. पोलिस निरीक्षक संतोष घोळवे म्हणाले, 'चंदगडमध्ये धार्मिक अनुचित प्रकार घडलेला नाही. दोन्ही समाज एकमेकांच्या सण, उत्सवामध्ये सहभागी होतात. आनंदाने सण साजरे करतात हे चित्र इतरांसाठी अनुकरणीय आहे.' नविद अत्तार, हक्काणी दरवाजकर, युसुफ शेरखान, जावेद सय्यद, झाकीर तगारे, सकलेन नाईक, मजीद तगारे, समीरुल्ला दरवाजकर, अझहर मदार आदी उपस्थित होते. नगरसेवक झाकीर नाईक यांनी आभार मानले.
