आमरोलीच्या तलावात बुडून गडहिंग्लजच्या युवकाचा मृत्यू

KolhapurLive


चंदगड : तिलारी परिसरात पर्यटनाचा आनंद घेऊन गडहिंग्लजकडे परतत असताना वाटेत जेवणासाठी काही वेळ थांबून विसावा घेताना गडहिंग्लज येथील शब्बीर रजाक हेब्बाळे (वय ४२) यांचा मुलाला वाचवण्याच्या प्रयत्नात तलावात बुडून मृत्यू झाला. ही दुर्घटना शुक्रवारी दुपारी घडली. हेब्बाळे हे मंडप डेकोरेटरचा व्यवसाय करतात. व्यवसायातून थोडीशी उसंत घेत आपल्या कुटुंबासह ते तिलारीनगर परिसरात स्वप्नवेल पॉईंटला गेले होते. तेथून भ्रमंती करून गडहिंग्लजकडे परतत असताना आमरोळीजवळ असलेल्या पाझर तलावाजवळ दापरच्या जेवणासाठी ते थांबले जेवण आटोपल्यानंतर डबा धुण्यासाठी म्हणून सुफियाना हेब्बाळे ( वय १७) हा तलावाकडे गेला.

डबा धुताना तो तोल जाऊन पाण्यात पडला. मुलाला वाचवण्यासाठी शब्बीर हेब्बाळे हे ही पाण्यात उतरले. मुलाला वाचवण्यात यश आले मात्र त्यांचा तलावात बुडून मृत्यू झाला. जखमी सुफियाना हेब्बाळे याला गडहिंग्लजच्या शासकीय रुग्णालायात दाखल करण्यात आले आहे.तर शब्बीर हेबाळे यांचा मृतदेह चंदगड येथील ग्रामीण रुग्णालयात आणून शवविच्छेदनानंतर नातेवाईकांच्या ताब्यात देण्यात आला. याची नोंद चंदगड पोलिसात झाली असून नातेवाईकांनी ग्रामीण रुग्णालय आवारात गर्दी केली होती.