शेकडो आरोग्य सेविकांनी पाटील यांच्या समोर वाचला समस्यांचा पाढा
चंदगड प्रतिनिधी: आरोग्य सेविकांना न्याय मिळवून देण्यासाठी सर्वोत्परी प्रयत्न करणार, वेळप्रसंगी आमचे नेते व राज्याचे उपमुख्यमंत्री देवेंद्रजी फडणवीस यांच्या मार्फत मुख्यमंत्री एकनाथजी शिंदे साहेब यांचीही भेट घेऊन याबाबत पाठपुरावा करणार असे आश्वासन चंदगड विधानसभा मतदारसंघाचे भाजपाचे नेते शिवाजीराव पाटील यांनी चंदगड आरोग्य विभागाच्या सेविकांना दिले. चंदगड आरोग्य विभागाच्या सेविकांनी आपल्या विविध समस्या व मागण्यांसाठी आज शिवाजीराव पाटील यांची भेट घेतली त्यावेळी ते बोलत होते. यावेळी चंदगडचे जेष्ठ नेते व माजी राज्यमंत्री भरमुआण्णा पाटील, तालुका अध्यक्ष नामदेवराव पाटील, रविंद्र बांदिवडेकर, भावकु गुरव व मोठ्या संख्येने आशा सेविका उपस्थित होत्या.
सविस्तर वृत्त असे की अवघ्या ३ हजार मानधनामध्ये गेली अनेक वर्षे या आरोग्य विभागाच्या सेविका अहोरात्र मेहनत करत आहेत. याच ३ हजारामध्येच त्यांची वाटखर्चीही असते. या तुटपुंज्या मानधनात कुटुंब चालवणं या सेविकांना अशक्य झाले आहे. महागाईचा भडका दिवसेंदिवस वाढत चालला आहे. अशा बिकट परिस्थितीतही ना सरकार ना प्रशासन या आरोग्य सेविकांचा विचार करत आहे. याच आरोग्य सेविकांनी कोरोना सारख्या जिवघेण्या संकटात स्वतः चा जीव धोक्यात घालून लोकांचे जीव वाचविले होते. आज याच आरोग्य सेविकांचे जगणं मुश्कील झाले आहे. नूकत्याच जाहीर झालेल्या अर्थ संकल्पामध्ये आशा स्वयंसेविकांचे, गटप्रवर्तकांचे, अंगणवाडी सेविकाचे मानधनात भरघोस वाढ करुन सरकारने ते दुप्पट केले परंतु या आरोग्य सेविकांचा विचारही सरकारने केला नाही. त्याचबरोबर या आरोग्य सेविकांमधील बहुतांश आरोग्य सेविका या कंत्राटी किंवा अंशकालीन तत्वावर काम करत आहेत. त्यामुळे त्यांना शासनाच्या कोणत्याही योजनेचा लाभ होत नाही. त्यामुळे मानधनात वाढ करावी, कंत्राटी सेविकांना नियमित करुन घ्यावे, वाटखर्ची मिळावी या मागण्यांसाठी चंदगड तालुक्यातील आरोग्य विभागाच्या शेकडो सेविकांनी राज्याचे उपमुख्यमंत्री देवेंद्रजी फडणवीस यांचे निकटवर्तीय व चंदगड विधानसभा मतदारसंघाचे भाजपाचे नेते शिवाजीराव पाटील यांची थेट त्यांच्या निवासस्थानी जाऊन भेट घेतली. पाटील यांनी त्यांच्या सर्व समस्या व अडचणी जाणून घेतल्या. यावेळी बोलताना पाटील म्हणाले, खरं तर ही समस्या राज्यस्तरीय समस्या आहे. त्यामुळे शासन दरबारी पाठपुरावा करण्याबरोबरच वेळप्रसंगी आमच्या नेते व राज्याचे उपमुख्यमंत्री देवेंद्रजी फडणवीस यांच्याशी चर्चा करून हा विषय मा.मुख्यमंत्री एकनाथजी शिंदे यांच्या समोर लवकरच मांडण्यात येईल. आरोग्य सेविकांचा हा प्रश्न मार्गी लावण्यासाठी भारतीय जनता पार्टीकडून सर्वोत्परी प्रयत्न करण्यात येतील असा विश्वास त्यांनी यावेळी व्यक्त केला. यावेळी या आरोग्य सेविकांनी पाटील यांना आपल्या मागण्यांचे निवेदनही दिले.
मानेला इजा झाली असतानाही पाटील यांनी आरोग्य सेविकांची भेट घेतली
गेली ३-४ दिवस झाले शिवाजीराव पाटील यांच्या मानेला गंभीर लचक भरली आहे. मानेची हालचाल करताना त्यांना प्रचंड वेदना होत होत्या. आशा परिस्थितीतही पाटील यांनी मानेच्या दुखण्याचे कोणतेही कारण न देता तत्काळ या आरोग्य सेविकांची भेट घेऊन त्यांच्याशी चर्चा केली. त्यांना न्याय मिळवून देण्यासाठी प्रयत्न करण्याचे आश्वासन दिले. त्यांचे हे जनतेप्रती असलेले प्रेम, तळमळ पाहून तिथे उपस्थित असलेल्या आरोग्य विभागाच्या शेकडो माता-भगिनी भारावून गेल्या. पाटील यांची तत्परता पाहून त्यांनी समाधान व्यक्त केले.
