टी-२० विश्वचषकामधील पहिल्या गटातील चित्र पूर्णपणे स्पष्ट झालं आहे. पहिल्या गटामधून न्यूझीलंड आणि इंग्लंडने उपांत्यफेरी गाठली आहे. भारताचा सामावेश असणाऱ्या दुसऱ्या गटातील चित्र आज म्हणजेच रविवारी स्पष्ट होणार आहे. आज दक्षिण आफ्रिका विरुद्ध नेदरलॅण्ड्स, भारत विरुद्ध झिम्बाब्वे आणि पाकिस्तान विरुद्ध बांगलादेश असे तीन सामने होणार आहे. या सामन्यांपैकी दक्षिण आफ्रिका आणि भारताने आपआपले सामने जिंकले तर पाकिस्तान स्पर्धेतून बाहेर पडेल. भारत झिम्बाब्वेविरुद्ध पराभूत झाला तर मात्र भारताच्या अडचणी वाढतील असं चित्र आहे.
विश्वचषक स्पर्धेसाठी आयसीसीने सुपर १२ फेरीमधील सामन्यांसाठी एकही राखीव दिवस ठेवलेला नाही. त्यामुळेच भारत आणि झिम्बाब्वेदरम्यानच्या सामन्याच्या दिवशी पाऊस झाला तर दोन्ही संघांना एक एक गुण वाटून दिला जाईल. म्हणजेच भारताकडे सात गुण होतील आणि भारत उपांत्य फेरीसाठी पात्र ठरले. भारत थेट पात्र ठरेल अशासाठी कारण सध्या दुसऱ्या स्थानी असणाऱ्या दक्षिण आफ्रिकेने आणि तिसऱ्या स्थानी असणाऱ्या पाकिस्तानने आपआपले सामने जिंकले तरी भारत पहिल्या दोन संघामध्ये सात गुणांसहीत जागा निश्चित असेल.
मात्र झिम्बाब्वेविरुद्धच्या सामन्यात भारत पराभूत झाल्यास आणि त्याचवेळी पाकिस्तानने बांगलादेशविरुद्धच्या सामन्यात मोठा विजय मिळवल्यास प्रत्येकी सहा गुणांसहीत उपांत्यफेरीमध्ये कोण जाणार हे नेट रन रेटच्या आधारावर ठरेल. विशेष म्हणजे सध्या सहा गुणांसहीत पहिल्या स्थानी असलेला भारत हा नेट रन रेटच्या बाबतीत दुसऱ्या स्थानी असलेल्या दक्षिण आफ्रिका आणि तिसऱ्या स्थानी असलेल्या पाकिस्तानपेक्षा मागे आहे.
दक्षिण आफ्रिकेचा नेट रन रेट हा १.४४१ इतका असून एक सामना न झाल्याने वाटून दिलेला गुण आणि दोन सामन्यांमधील विजयामुळे त्यांचे एकूण पाच गुण आहेत. पाकिस्तान विरुद्धचा सामना पराभूत झाल्याने त्यांना नेट रन रेटमध्ये मोठा फटका बसला आहे. पाकिस्तान विरुद्धच्या सामन्याआधी दक्षिण आफ्रिकेचा नेट रन रेट हा २.७७२ इतका होता. पात्रतेच्या फेरीमध्ये बांगलादेशही शर्यतीत दिसत आहे. बंगलादेशच्या नावावरही पाकिस्तानप्रमाणेच चार गुण असून त्यांचा नेट रन रेट हा उणे १.२७६ इतका आहे. या स्पर्धेमध्ये दुसऱ्या गटातून झिम्बाब्वे आणि नेदरर्लण्ड्स बाहेर पडल्यात जमा आहे. प्रत्येक गटामधून दोन संघ उपांत्यफेरीसाठी पात्र ठरणार आहे. त्यामुळे सध्या तरी दुसऱ्या गटातून भारत, दक्षिण आफ्रिका, पाकिस्तान आणि बांगलादेश यांच्यामध्ये अंतिम दोन स्थानांसाठी चुरस दिसून येत आहे.